您找過以下的關鍵字

尚無搜尋紀錄

寄金簿仔

│予老伴的情詩





少年的時 拍開

咱的寄金簿仔

干焦 看見妳美麗的形影

存著 妳真正迷人的笑聲

你佮我 勇敢牽手鬥陣行

佇海邊看 捙畚斗的海湧

干焦送你草仔枝做的手指

鉸著 一蕊紅花送予你

請你 等我有一工趁錢

我會予你 用鑽石掛耳



彼陣 咱雖然無錢

希望 一年過了閣一年

有閒 牽你的手去到海邊

聽淡薄仔粗魯的 風聲

看一陣一陣白鴒鷥的身影

安慰著你甘苦的 心情

講出的話親像咧畫大餅

雖然你無出聲 阮嘛知影

聽罔聽 艱苦的路途

嘛愛 繼續來行……





三十歲以後 拍開

寄金簿仔 紀錄著

薄薄的 薪水

囡仔 提領的學費

人情世事的 紅白包

也閣有 為錢財的怨氣

彼段時間 厝內米甕弄樓

儉腸凹肚 想欲趁錢

學做作家想用字來換米

創作的文章無一點詩意

寫小說投稿 報社主編

無合意 欲怎樣

煮字療飢?



公教人員的翁某

家庭經濟 真甘苦

斤斤計較 嘛無步

為著 納會仔錢

你只好出去 食頭路

為著 全家大細的腹肚

為著 囡仔未來的前途

阮無法度 共你照顧

彼本 寄金簿仔紀錄著

為生活賭氣的 甘苦

人講 翁佮某是相欠債

誰欠誰 總是算袂清

人講 家合萬事興

翁佮某 是三世人的溫情





六十歲以後 拍開

咱的 寄金簿仔

記著 補喙齒的金額

白頭毛增加的數量

一支摘了閣一支

目睭拍袂金的甘苦

目油 又閣流未離

思念囝孫 滿腹心內話

吞袂過 嚨喉管

孫仔的代誌 咱做夥

參詳 食愈老愈有量



兩位查某孫欲出國

讀冊 心內雖然毋甘

嘛是愛放伊出去

in的 前途佇北美的加拿大

冷霜霜 離開咱遠 遠遠

俗語 魚為奔波始化龍

將目屎 記踮寄金簿仔

準備淡薄紅包 寄去

遠方 受風雪吹凍的時

小表達 疼惜孫仔的心意

若想起這款代誌

嚨喉就滇……





花的目屎

│敬致楊逵及太陽花



玫瑰花 紅記記

為台灣 拚生死

目屎流 目屎滴

石頭硩袂死 花蕊

開向 台灣民主的春天



百合花 白泡泡

花開中正廟佮街頭

欠人照顧的野百合

用智慧 弄破萬年體制

封殺 鎮砧的死豬皮



日頭花 有夠濟

開佇 台灣的街頭巷尾

為著 人民的腹肚

頭擋 木棍佮水龍

面皮染成血色 日頭花